"Draga domača rieč 2019"
(iz zbornika)

Poklje tuliko liet

Išla sam prema toj hiži.
Nočima senjanoj.
Cigli porušeni, (tu su bili kojci?).
Dalje v brieg, ciela je...
Serce mi je zaderhtalo.
Po dužine kraj ceste
jako dotrajala, a onda žičani plot.
Za plotom mala vrata.
Pred njimi, v mojih senjah,
na stolcu pod jorgovanom
nasmejana, okruglih obrazov,
ropca zvezanog i v širokoj kiklji,
ma baba.
A nutra na lievo čez gonjk
v kuhinji strina me ma z
orehnjačom i jabučnicom čaka.
Čez kuhnju na drugom delu hiže
vidim
kameni žervenj melje,
i z vročeg pepela krušne peči
teta vadi domači kuruzni kruh.
Štenge su prema dvorišču
de su štale i kojci.
Pes, mujceki, race, goske, kokoši,
konji, krave, pajceki.
Senjak nad štalami.
I dalje čez natkriti prolaz
vidi se vugrad.
Kak je fina jabučnica
napravljena z stričevih rok.
Još sam pri lesi.
A je ko doma?
Na prednjem dielu hiže de su sobe novi je črep.
Pred hižom v zelenoj travi - bunar
z šterega je naboljša voda na svietu.
A je ko doma?
Ne hupam se iti do vrat.
Rane je jutre. Se je tihe.
Da ne zbudim
koga
poklje tuliko liet.
Poklje tuliko liet
moje je serce živo
od sreče.
O liepa, o rodna hiža mojega pokojnoga tate.
Da te vej gledim
kak da znova živim.
Tetu, strinu, strica, decu...
...nejdem dalje od plota.
Nek i dalje baba v mojih senjah
nasmejana
pred vratima pod jorgovanom
sedi,
topli je takev dom
da vu njemu i nikega več ni.
(Anica Bukovec)